Saluton, gesamideanoj,

Unue, mi dankas tiujn el vi, kiuj venis al la proponita ret-rendevuo, la 17an de decembro 2000, je la 15a UTS.
Bedaŭrinde, pro la samtempe okazanta prezentado, ne okazis vera mesaĝ-interŝanĝo inter la publiko (de la Zam-festo apud Parizo) kaj la ret-kunvenintoj.

Krome, dumprezente, eĉ mi mem ne povis ĝui vian babiladon, sed tion mi faris poste, legante la arĥivon. Estis plezuro ekscii, ke tiu ret-kunveno fariĝis rekordo laŭ la nombro da sammomentaj babilintoj, kaj ke eble estontece pliaj tiaj kunvenoj okazos.

Ankaŭ la publiko vidis ne multon pri via babilado : tio ne estis trompo flanke de la organizintoj, sed estis provo... (vidu kialojn sube).

Nun, spert(et)o ekestis kaj espereble utilos por estontaj prezentadoj. (Mi duonpretigis dosieron doc-formatan, pli kompletan, kun priskribo de la bezonata materialo, pri kion fari antaŭ, dum kaj post la prezentado, ktp. : se iu deziras)

Ĝis, Laurent

Malsukcesaĵoj :
Mankis tempo	En duon-horo, inkl. prezentadon de vizitindaj TTT-ejoj, ne sufiĉis la tempo por interŝanĝi multajn mesaĝojn.
Amasa publiko	La publiko rigardis surmuran ekranon, kaj do malfacilis al unuopaj homoj fari demandojn. En tiaj kazoj, eble iu kun mikrofono devus cirkuli tra la publiko. Cetere, por veraj interŝanĝoj (i.a. sinsekvaj mesaĝoj pri sama temo), devus esti 1 homo por 1 komputilo, tio signifas libere disponeblaj komputiloj por la publiko...
Malbona videbleco	La ekrano ne estis granda kineja ekrano (vidu la fotojn), kaj preskaŭ ne legeblis la normalaj literoj de la prezentitaj TTT-ejoj. Necesis prezenti paĝojn kun antaŭpligrandigitaj literoj aŭ kun desegnoj (flagoj,...).

Notinde :
Lando-kodoj	Unu el la celoj estis montri al ne-E-a publiko, ke la ret-babilantoj venas de plej diversaj landoj. Oni tion povas anonci per la diritaĵoj mem (ekz. "Nun estas la ..a horo ĉe mi", "Hodiaŭ estas neĝo", "Aktualaĵoj", ktp.) sed tiuj indikoj aperas nur dum momenteto kaj poste malaperas. Pro tio, estas bone, ke en la (pseŭdo)nomoj mem de la babilantoj videblu la landoj. Cele tion, probable la plej bona maniero estas majuskle skribi la lando-kodojn, ekz. inter krampoj "Zamenhof (PL)". Tion faris kelkaj kaj la publiko povis tre facile vidi la literojn RU, UA,.... Krome, la dekstra listo de la babilantoj faciligis tujan vidon al la lando-diverseco.
Facile uzebla	Granda avantaĝo de tiu babililo estas, ke iu ajn povas ĝin facile uzi, eĉ lastmomente. Oni ne bezonas instali apartan programon (ICQ ? IRC ?), ktp.